TVB搞咗6屆「香港先生」,有邊位「港男」紅爆燈?

「香港先生」選舉(Mr. Hong Kong)系TVB自2005年起舉辦嘅男士選美活動,總決賽喺每年7月或8月期間舉行,大會口號為「創造男人新主義」。參賽者經過唔同形式嘅篩選而進入總決賽。節目於2012年起全面停辦,總共搞左6年咁大把。

以下十幾位「香港先生」雖然仲活躍喺娛樂圈,但真正上到位嘅又有幾多個?

【高鈞賢】

先講2005年首屆港男冠軍,高鈞賢系比蔡思貝更早似木村拓哉嘅選美參賽者。雖然初時靠個樣,加上選舉表現得到司儀Do姐加持,撈到2007年有得拍倉底劇《幕後大老爺》做男二,但越撈越霉,《寒山潛龍》要非禮阿婆,自己都頂唔順而約滿走人。離巢後除咗搞餐廳、車房生意,仲返內地拍劇《山海經之赤影傳說》,同劇仲有關智斌。

【鄭健樂】

2005年「健力組」冠軍,總冠軍敗於「瀟灑組」冠軍高鈞賢后簽約TVB拍劇,不過亦有眼利網民發現佢早於1997年星爺嘅《算死草》就已經做過陪審員。Rocky演出戲集頗多,多屬過鏡角色。本為健身教練嘅Rocky,玩 CC fitness嘅新《愛回家》自然預埋佢。網民撐得啱,如果睇張振朗、何君誠嘅,橫掂都系無演技,起碼Rocky睇得開心先。

【黃長興】

2005年港男健力組敗於Rocky;入行10年,演技、口才都普通,睇《湊仔攻略》就知。不過似乎專心搞法國餐廳居多,TVB似客串性質,咁咪醒咯。

【陳志健】

2006年健力組冠軍,總冠軍敗於黃長發。曾經憑《仁心解碼》患自閉症嘅子浩、《拳王》嘅阿力被觀眾網民贊,但小編認為吹大咗。因為都唔好講「愛瑜珈」無發揮嘅角色及劇情,只要睇過《張保仔》佢做小虎,就知佢凈系識凸眼扮嬲,睇得出落力演但就無火,被網民形容為「TVB劉馬車」真系夠曬貼切;而且一陣讀稿味,又系健力組出身,其實只系「弱版」嘅Rocky,應該要向岳父羅樂林偷偷師。

【姚浩政】

2006年落選港男;主要做主持,據說出面開班好爆滿,系咪咁有料觀眾唔會知道,因為去到邊都仲有阿旦鄭丹瑞。拍劇大茄居多,但《使徒行者》因做歡喜哥手下而有不少鏡頭(上圖右)。

【袁偉豪】

2007年勇奪港男冠軍前已有不少幕前經驗,例如廣告做「維他奶仔」、《新古惑仔之少年激鬥篇》做巢皮、《賭俠1999》做華神細佬、《重案黐孖Gun》信仔等等。簽TVB,等到2012年《On Call 36小時》首次有男三做,平穩普通;去年《拆局專家》首次做男二,劇本唔得以致演出平平。

代表作一定系膠劇《鐵馬戰車》,就算不計與姚瑤嘅感情線,做嬉皮笑臉唔定性嘅督察施馬Sir亦唔趕客,而且名義上男二但劇份多過、搶過男一大隻斌。系力捧緊,《飛虎》監製林志華疑似翻炒《無限復活》嘅《EU超時任務》就快出街,之後會有《城寨英雄》,即管睇睇值唔值捧。

【李豪】

2007年港男;多得《愛回家》同馬子妮一pair為部分觀眾所認得,不過就被觀眾認為太乸型、講嘢煩而入唔到屋。演藝路暗淡,不過假假地都同羅鈞滿、張景淳、沈震軒3個TVB力捧藝人唱過歌《獸拳戰隊》。

【何君誠】

2007年曾以塗俊之名演出亞視劇集《激流青春》,由張達明、黃一飛、邵仲衡帶新人,包括連詩雅和仍叫翟鋒嘅翟威廉。2008年落選港男,so far「代表作」為《愛回家》Billy,死未。

【羅天宇】

2008年港男少年組冠軍。做大茄,直到2012年《愛回家》馬子仁一角入屋,全靠劇中佢和阮兒Pinky生B,馬家有得回巢救何君誠、張振朗。人生最大成就系曾經溝掂苟姑娘,雖然苟姑娘堅稱「好守規矩」。

【溫家偉】

「大隻仔」2008年港男少年組大熱倒灶,入行後通常做傍友或者主角好友,例如《衝線》嘅「賤熊」、《鬼同你OT》嘅「慢黑鈍」;亦因口音而常做ABC角色,例如《鐵馬戰車》做揸車問路嘅鬼仔。最近演出為《潮流教主》,做難得唔使做奸角嘅攝影師「認字特警」助手。

【郭田葰】

2009現場最具人氣香港先生,做主持居多,例如《明珠生活》、《港生活·港享受》。因醫生出身而成為TVB御用醫生之一,例如《拆局專家》、《樓奴》、《On Call 36小時》;《實習天使》做埋顧問之一,但點解咁多甩漏位俾護士插到反艇嘅?

【許家傑】

2009年冠軍,拉丁舞好手。keep住每年6-10套劇出街嘅老是常出現大茄。最近演出有《愛情食物鏈》用下欄扮上菜嘅廚師Augustino,和《公公出宮》胡定欣內定招親對象高軍。

【翟威廉】

2005年亞洲先生亞軍,2009年約滿後,2010年參選港男橫掃8獎,入TVB做閒角居多。《華麗轉身》已經算有較多戲份。話曬參選時橫掃都要系咁咦捧一捧,之後會有套港韓合拍劇《七天嘅浪漫》做男三,脆魚姐擔正,陳智燊做男二,牌面趕客到呢。

【白健恩】

演藝學院跳舞出身,2010年落選港男。從影唯一令觀眾記得系2012年《法網狙擊》迷奸高Ling。翌年拜徐家傑為師學古泰拳,去年再拜馬天樂本合門門下,密謀做影圈打仔。唔知幾時先可以做到下一個伍允龍呢?

上述一堆港男,多數表現、發展都麻麻,得袁偉豪暫時似樣(但其實《Sunday好戲王》第1集已經露露地底~)、Rocky夠奇離,其他真系爭啲特色同實力。無料唔緊要,起碼搵到自己位置。唔似港姐,三甲如「高音貝」、「陳凱琳」到最近嘅邵佩詩、王卓淇,一埋位就女二女三起跳等做女一,盞觀眾睇劇睇到想爆粗~

金句王